De thing wey happen to U.S.A for
Sydney 2000 Olympic suppose don teach plenty people lesson.
U.S.A for every Olympic always
de-do well. Dem follow de dey on top of medal table as dem for almost
all de event wey dey for Olympic.
Today, U.S.A athlete dem don rub
shit for dem people face. Sydney 2000 Olympic don helep us to open dem
yansh as people wey de use jipity win dem medal.
De first one wey International
Olympic Committee 10C people discover na U.S.A fastest woman for dat
year Marion Jones wey dey for prison now becos of say she don gree say
she use drug to run all de race wey she take win plenty gold medal for
Sydney Olympic.
I thank God for people wey bring
de idea say make dem de- test de piss and blood of de athlete dem
after dem run finish.
If no be so, people like U.S.A
athlete dem for still de-cover our eye and receive our praise as
people wey de-do well pass other country dem.
De one wey surprise me be say de
U.S.A athlete dem de-even take another medicine wey de-cover de drug
wey dem don swallow before to make am hard for de people wey de do de
test to know wetin de happen.
I know how Marion Jones test
take hard doctor dem until she come finally use him mouth convess say
she really take drug run for Sydney 2000 olympics.
Today, de American sisi don de
smell rod for one prison for U.S. so. Dem say she go dey there reach
six month, and becos of dis matter, de 10C people wey de-organize
Olympic don agree to collect all dem medal from de sisi and give back
to de people wey she run pass for dat Olympic. For dat one, Naija de
expect to collect one medal from de sisi hand.
Again, we hear say another U.S.A
men team wey run 4*100m race for de same Olympic for Sydney also take
drug before dem run de race and win gold medal for am. Dem say two
people wey follow run dat race swallow drug wey de helep give person
more power and becos of dat, too, 10C people don decide to collect
back dem gold medal from de team and give to de people wey come second
wey be Naija.
Shebi una see wetin jipity fit
cos a whole country?
Now, Popular side de beg our
people wey dey Beijing make dem shine dem eye and no bring shame to us
o. Una bye-bye.
